Прэзідэнт Польшчы Анджэй Дуда пачаў працэдуру памілавання экс-кіраўніка МУС, чальца былой кіроўнай партыі «Права і справядлівасць» Марыюша Каміньскага і ягонага намесніка Мацея Вонсіка, перадае PAP.
«Я вырашыў пачаць працэс памілавання — сказаў Дуда. — Я хачу, каб усё прайшло ў адпаведнасці з усімі нормамі Канстытуцыі».
Паводле яго, сваю заяву ён адпраўляе генпракурору краіны, які мусіць выказаць сваё меркаванне. «Такія працэдуры», — адзначыў прэзідэнт Польшчы, сказаўшы, што папрасіў генпракурора неадкладна прыняць рашэнне пра вызваленне.
Пры гэтым Дуда чарговы раз заявіў, што яго першае рашэнне пра памілаванне Каміньскага і Вонсіка, прынятае ў 2015 годзе «як па падручніку», мае законную сілу.
«Гэта складаная для мяне сітуацыя як з прававога пункту гледжання, так і з асабістага, — падкрэсліў Дуда, адзначыўшы, што Каміньскі — яго сябар і прыстойны чалавек. — Я не сумняваюся, што яны — першыя з 1989 года палітычныя зняволеныя».
Каміньскага і Вонсіка ў снежні паўторна асудзілі па справе пра злоўжыванне паўнамоцтвамі, дапушчанае падчас іх працы ў Цэнтральным антыкарупцыйным бюро. Упершыню ім вынеслі прысуд у 2015 годзе, але Дуда ў выніку памілаваў іх.
9 студзеня паліцыя атрымала ад суда дакументы для затрымання Каміньскага і Вонсіка ў сувязі з новым прысудам, але па месцы жыхарства іх не знайшлі. Абодва ў той дзень паехалі на сустрэчу з Дудам, іх затрымалі ў прэзідэнцкім палацы ў Варшаве. Прэзідэнт Польшчы назваў затрыманне незаконным.
