Пенсіянер з Нясвіжа папрасіў транспартных інспектараў праверыць кіроўцу маршрутнага таксі Клецк-Бараўляны-Клецк, які няветліва з ім абышоўся. Тыя разабраліся ў сітуацыі, а потым перадалі матэрыял на парушальніка ў падатковую, паведаміла ў тэлеграм-канале прэс-служба Упраўлення аператыўных мерапрыемстваў інспекцыі МПЗ па Мінску.
4 кастрычніка пенсіянер хацеў дабрацца на маршрутцы ў Нясвіж з Мінска. Мужчына выйшаў на прыпынак «Дзіцячая клінічная бальніца» і чакаў прыбыцця аўтамабіля. Паводле раскладу транспарт мусіў прыехаць у 13.50, але ўжо ў 13.40 пенсіянер заўважыў, што яго маршрутка праносіцца міма яго не спыняючыся, хоць ён «падаваў знакі кіроўцу, махаў рукамі».
Мужчына адразу патэлефанаваў дыспетчару. Пасля гэтага на мабільны кліента патэлефанаваў сам маршрутчык.
«Ён сказаў, што спыніў машыну, і я мушу паспяшацца, бо ён доўга чакаць не збіраецца. І я на 61-м годзе жыцця пабег да маршруткі на адлегласць каля 500 метраў. На ўваходзе ў машыну я папрасіў прабачэння сам не ведаю за што, на што мне кіроўца адказаў, што мае прабачэнні яму „да аднаго месца“. Я заплаціў за праезд, але праязны дакумент мне выдадзены не быў», — напісаў у скарзе ў транспартную інспекцыю мужчына, адзначыўшы, што ўсяго, чаго ён дамагаецца сваёй заявай, — «выбачэнняў ад кіроўцы».
Транспартныя інспектары знайшлі парушальніка, правялі праверку і перадалі матэрыял у падатковую інспекцыю.
«Мяркуючы па матэрыялах справы, [кіроўца] „шчыра раскаяўся“. Практычна аналагічная працэдура яго чакае і ў нас за нявыдачу плацёжнага дакумента», — расказалі ў падатковай.