У нямецкім горадзе Ашафенбург мужчына напаў на людзей з нажом — два чалавекі загінулі, у тым ліку двухгадовае дзіця, піша BILD.
Інцыдэнт здарыўся ў парку Шонталь у цэнтры горада. Паводле папярэдняй інфармацыі, некалькі чалавек, у тым ліку група дзяцей з дзіцячага садка, былі параненыя нажом. Першапачаткова паліцыя паведамляла пра трох дарослых і адно дзіця. Пазней у праваахоўных органах паведамілі, што два чалавекі ў выніку нападу загінулі.
Паводле інфармацыі BILD, ахвярамі сталі 41-гадовы мужчына і хлопчык ва ўзросце двух гадоў. Акрамя таго, «двое цяжкапараненых знаходзяцца на лячэнні ў бальніцы», паведамляе паліцыя. Сярод пацярпелых з цяжкімі траўмамі таксама можа быць дзіця.
Паводле звестак следства, затрыманы мужчына. Меркаваны злачынец — 28-гадовы афганец, які, паводле інфармацыі BILD, раней дэманстраваў прыкметы псіхічнага разладу. Паводле інфармацыі Spiegel, затрыманага завуць Энамула О., ён жыве ў цэнтры для просьбітаў прытулку. Мужчыну раней абавязалі пакінуць краіну. Пра гэта ўлады абвясцілі на прэс-канферэнцыі.
Афганец прыехаў у Германію ў лістападзе 2022 года, але прытулку яму не далі. У канцы мінулага года ён абвясціў пра свой добраахвотны ад’езд. Пасля гэтага яго хадайніцтва пра прытулак было спыненае, але афганец застаўся ў краіне.
Відавочца паведаміў выданню Main-Echo, што затрыманага адводзілі, выкарыстаўшы «захоп з душэннем». Раней следчыя на платформе X (экс-Twitter) паведамлялі пра двух затрыманых, але пазней удакладнілі: другі чалавек аказаўся сведкам, якога дапытваюць.
Прычыны інцыдэнту пакуль няясныя. Паводле інфармацыі паліцыі, рух цягнікоў быў часова прыпынены, бо падазраваны спрабаваў уцячы па чыгуначных шляхах. Парк Шонталь плошчай дзевяць гектараў быў ачэплены.
У лістападзе мінулага года паліцыя класіфікавала парк як «небяспечнае месца» праз выпадкі рабаванняў і нанясення цялесных пашкоджанняў у асяроддзі, звязаным з наркотыкамі, паведаміў кіраўнік паліцыі Франк Экхарт. У парку рэгулярна дзяжураць пешыя патрулі, што, магчыма, і дазволіла хутка затрымаць падазраванага.
Ашафенбург знаходзіцца ў адміністрацыйнай акрузе Ніжняя Франконія (Баварыя), недалёка ад мяжы з федэральнай зямлёй Гесэн.