Беларускія атэстаты пра сярэднюю адукацыю будуць прызнавацца ў Польшчы на ўзроўні «матуры» — польскага атэстата сталасці. Іншыя патрабаванні да дакументаў абітурыентаў, якія цяпер адрозніваюцца ў залежнасці ад ВНУ і рэгіёна, будуць уніфікаваныя. Пра гэта ішла гаворка на сустрэчы Святланы Ціханоўскай з міністрам адукацыі Польшчы Барбарай Навацкай, паведамілі ў Аб’яднаным пераходным кабінеце, піша MOST.
У Мінадукацыі Польшчы адзначылі, што «падрыхтавалі прадпісанні, якія палепшаць працэс прызнання дакументаў беларусаў, што паступаюць у польскія ўстановы адукацыі». Падрабязнасцяў там не паведамілі.
Акрамя таго, на сустрэчы з міністрам замежных справаў Радаславам Сікорскім Ціханоўская заклікала спрасціць умовы выдачы студэнцкіх візаў беларусам. Яна звярнула ўвагу на тое, што цяпер моладзі часта адмаўляюць у студэнцкіх візах.
Нагадаем, што з бюракратычнымі праблемамі сутыкнуліся абітурыенты і студэнты. У лістападзе 2023 года скончыўся тэрмін пагаднення паміж Беларуссю і Польшчай пра супрацоўніцтва ў сферы адукацыі, але яшчэ да таго Беларусь прыпыніла дзеянне гэтага дакумента. Пагадненне прадугледжвала ўзаемнае прызнанне атэстатаў і дыпломаў. Калі яно перастала дзейнічаць, ад беларускіх абітурыентаў у Польшчы пачалі патрабаваць даведку, якая пацвярджае легальнасць атэстатаў. Але з яе атрыманнем у Беларусі ўзніклі праблемы.
Тады Польшча ўнесла змены, адмяніўшы неабходнасць падачы гэтай даведкі. Цяпер прызнанне дакументаў адукацыі ажыццяўляецца на аснове адміністрацыйнага рашэння. Аднак рады адукацыі — кураторыумы — маюць права вызначаць свае крытэры прызнання атэстатаў і дыпломаў.
На практыцы гэта значыць, што многія кураторыумы патрабуюць ад беларускіх абітурыентаў сертыфікатаў цэнтралізаванага тэставання. А яны сапраўдныя ўсяго два гады. Атрымліваецца, некаторым абітурыентам трэба вярнуцца ў Беларусь, каб прайсці ЦТ. Але не для ўсіх гэта бяспечна.