Лідарка беларускіх дэмакратычных сіл Святлана Ціханоўская лічыць, што запрашэнне беларускіх афіцыйных асобаў на цырымонію ўручэння Нобелеўскай прэміі 2023 года скампраметуе «каштоўнасці Альфрэда Нобеля». Пра гэта яна напісала ў Twitter.
«Я заклікаю Нобелеўскі фонд і Нобелеўскі камітэт не запрашаць прадстаўнікоў нелегітымнага рэжыму Лукашэнкі ні на якія мерапрыемствы. Каштоўнасці Альфрэда Нобеля не мусяць быць скампраметаваныя», — падкрэсліла Ціханоўская.
Яна таксама заклікала фонд і камітэт запатрабаваць неадкладнага вызвалення лаўрэата Нобелеўскай прэміі міру 2022 года Алеся Бяляцкага.
Нагадаем, Расію і Беларусь зноў запрасілі на банкет у Стакгольме з нагоды ўручэння Нобелеўскіх прэмій, паведамляе Нобелеўскі фонд. Летась іх не ўключылі ў лік запрошаных з прычыны вайны ва Украіне.
Ва Украіне асудзілі рашэнне Нобелеўскага фонду запрасіць амбасадараў Беларусі і Расіі на цырымонію ўручэння Нобелеўскай прэміі 2023 года.
Цяпер у Беларусі адбывае зняволенне ў калоніі нобелеўскі лаўрэат Алесь Бяляцкі. 3 сакавіка 2023 года кіраўніка праваабарончага цэнтра «Вясна» асудзілі на 10 гадоў калоніі. За паўгода да гэтага, у кастрычніку 2022-га, Бяляцкі атрымаў Нобелеўскую прэмію міру.