Міністэрства юстыцыі прапанавала Беларускай партыі «Зялёныя» запусціць працэс самаліквідацыі і прадставіць доказы. Пра гэта «Народнай волі» расказаў яе старшыня, бізнесовец Дзмітрый Кучук, і пералічыў дзіўныя абставіны, якімі суправаджалася патрабаванне ведамства.
Мінюст даслаў партыі «Зялёныя» афіцыйны ліст з прапановай яе прадстаўнікам правесці з’езд і прыняць рашэнне пра самаліквідацыю. Там таксама гаворыцца, што неабходна праінфармаваць ведамства пра дзеянні што да вырашэння гэтага пытання да 14 чэрвеня.
— Мы на гэта можам адказаць завочна Мінюсту, што з’езд у нас запланаваны на студзень 2024 года і мы, вядома, занясём у парадак дня пытанне пра самаліквідацыю, — паабяцаў Кучук.
Паводле яго словаў, яны таксама атрымалі тлумачэнне ад Нацыянальнага цэнтра абароны персанальных звестак наконт апрацоўкі персанальных звестак чальцоў партыі.
— Высветлілася, што Мінюст падчас запытвання ў палітычнай партыі інфармацыі, якая змяшчае спецыяльныя персанальныя звесткі, мусіў быў даслаць нам спасылку «на спецыяльны заканадаўчы акт, які прадугледжвае права дзяржаўнага органа на атрыманне такой інфармацыі». Я разумею так: раз нам такой спасылкі ніхто не дасылаў, значыць, Мінюст не мае права патрабаваць у нас персанальныя звесткі заснавальнікаў нашай партыі, — заявіў Дзмітрый Кучук.
Старшыня партыі расказаў і пра праведзеную нядаўна размову з прадстаўніком Міністэрства, «з якой нечакана высветлілася, што кудысьці зніклі нашыя партыйныя дакументы, якія мы высылалі ў Мінюст — статут, пасведчанне аб рэгістрацыі, пратакол».
— Паводле чыноўніка, гэтых дакументаў у іх няма. Мабыць, трэба будзе разбірацца, як такое магло здарыцца. Спадзяюся, разбяромся з гэтай незразумелай сітуацыяй… — дадаў Кучук.
Беларуская партыя «Зялёныя», як сказана ў статуце, «з'яўляецца грамадскім палітычным аб’яднаннем грамадзян Рэспублікі Беларусь, якія прытрымліваюцца агульных палітычных, сацыяльных і экалагічных поглядаў, словам і справай спрыяюць будаўніцтву Беларусі як дзяржавы свабодных людзей, якая зможа забяспечыць сваім грамадзянам права на здароўе, даўгалецце і паўнавартаснае жыццё ў сацыяльна і экалагічна здаровым асяроддзі».
Сярод напрамкаў яе дзейнасці — удзел у экалагічных экспертызах і супрацоўніцтва з міжнароднымі арганізацыямі, у тым ліку ў галіне аздараўлення пацярпелых ад Чарнобыльскай катастрофы дзяцей.
Партыя была зарэгістраваная ў 1994 годзе і, як вынікае з ліста Мінюста, не прайшла перарэгістрацыю ў належны тэрмін.
Што адбываецца з палітычнымі партыямі ў Беларусі
Нагадаем, 14 лютага Аляксандр Лукашэнка падпісаў закон пра палітычныя партыі. Беларускія партыі пасля ўступлення закона ў сілу мусяць цягам трох месяцаў падаць у Мінюст дакументы на перарэгістрацыю па новых правілах, і Мінюст мусіць цягам паўгода перарэгістраваць іх альбо прыняць рашэнне пра іх ліквідацыю. Грамадскім аб’яднанням трэба будзе прывесці свае ўстаноўчыя дакументы ў адпаведнасць з новымі патрабаваннямі цягам года.
У снежні мінулага года падчас абмеркавання гэтага законапраекта Лукашэнка заявіў, што «на палітычным полі краіны павінныя працаваць толькі тыя партыі, дзейнасць якіх адпавядае асноўным прынцыпам унутранай і знешняй палітыкі».
А міністр юстыцыі Сяргей Хаменка спрагназаваў, што з 15 зарэгістраваных у Беларусі партый застануцца тры-чатыры — прычым усе яны «павінныя падтрымліваць канстытуцыйны лад, не павінныя прапагандаваць тэрарызм, экстрэмізм, не павінныя працаваць на падрыў таго грамадства, якое ёсць у Рэспубліцы Беларусь».
2 траўня Мінюст зарэгістраваў праўладную партыю «Белая Русь», якая «вырасла» з аднайменнага грамадскага аб’яднання. Яе старшынёй абралі сенатара Алега Раманава, а ў найвышэйшы палітычны савет структуры ўключылі прапагандыста Рыгора Азаронка.
Структура ўжо паспела засвяціцца ў абмеркаванні вывазу ў Беларусь дзяцей з акупаваных тэрыторый Украіны.