Звужэнне асартыменту тавараў у крамах Беларусі перад навагоднімі святамі недапушчальнае. Пра гэта заявіў кіраўнік Міністэрства антыманапольнага рэгулявання і гандлю (МАРГ) Беларусі Аляксей Багданаў, паведамляе прэс-служба ведамства.
«Беларускія вытворцы, пастаўшчыкі, а таксама імпарцёры абавязаныя забяспечыць рытмічную пастаўку шырокага асартыменту тавараў на паліцы нашых крамаў. Звужэнне асартыменту недапушчальнае!» — заявіў Багданаў на нарадзе з вытворцамі, імпарцёрамі, гандлёвымі арганізацыямі па пытаннях забяспечання спажывецкага рынку айчыннай прадукцыяй у перадсвяточныя і святочныя дні Раства і Новага года.
Паводле яго словаў, дзяржава ўклала вялікія сродкі ў вытворчасць імпартазамяшчальнай прадукцыі, па большасці таварных групаў гэта ўдалося, і беларускую прадукцыю чакаюць ва ўсім свеце. Аднак, нагадаў ён, Аляксандр Лукашэнка паставіў задачу нумар адзін — насычэнне ўнутранага рынку.
«Гэта непарушнае правіла для ўсіх удзельнікаў рынку», — дадаў кіраўнік МАРГ.
Нагадаем, пасля ўвядзення жорсткага рэгулявання цэн у Беларусі нашыя чытачы неаднаразова паведамлялі пра скарачэнне асартыменту ў некаторых крамах і недахоп асобных тавараў. Гэта датычыць як прадуктаў, так і бытавой хіміі і касметыкі ці кармоў для жывёл. Пры гэтым чыноўнікі наперабой заяўляюць, што дэфіцыту тавараў няма. Аднак Камітэт дзяржкантролю паабяцаў прымаць самыя жорсткія меры за высокія цэны і «дрэнны асартымент».
Тым не менш недахоп некаторых тавараў адзначылі нават афіцыйныя прафсаюзы — напрыклад, гаворка ідзе пра збяднелы асартымент касметыкі, сродкаў асабістай гігіены і бытавой хіміі, прычым цэны на іх выраслі ў разы. Гэта звязваюць з тым, што шэраг буйных міжнародных карпарацый сышоў з расійскага і беларускага рынкаў, хоць і не ў поўным аб’ёме, але скараціліся пастаўкі, засталіся толькі прадметы першай неабходнасці.