Амерыканскі актор Джэк Нікалсан нечакана прыцягнуў увагу карыстальнікаў сацсетак не толькі навагоднім віншаваннем, але і творам мастацтва ў сваім доме. На фота ў Instagram за яго спінай можна заўважыць карціну, падобную да «Евы» мастака Хаіма Суціна, якая была набытая «Белгазпрамбанкам» і стала адным з сімвалаў мірных пратэстаў 2020 года.
Джэк Нікалсан выклаў навагодняе фота са свайго дома, на якім абдымае дачку Ларэйн. У каментарах карыстальнікі звярнулі ўвагу на палатно, якое вісіць на сцяне, і дапусцілі, што гэта «Ева» — праца ўраджэнца Смілавічаў, мастака Хаіма Суціна.
Аднак насамрэч гэта іншая, хоць і падобная, карціна Суціна — «Жанчына са скрыжаванымі рукамі», напісаная каля 1929 года, праз год пасля стварэння «Евы». У выяўленай на ёй мадэлі святлейшыя валасы і іншы фасон адзення, а само палатно большае памерам. Паводле звестак сайта pubhist.com, менавіта гэтай працай беларускага мастака валодае Нікалсан.
«Еву» ж яшчэ ў 2013 годзе Белгазпрамбанк набыў за 1,8 млн даляраў. У 2020 годзе, пасля таго як карціну разам з яшчэ больш чым сотняй іншых работ карпаратыўнай калекцыі «Белгазпрамбанка» агульным коштам каля 20 млн даляраў далучылі да гучнай крымінальнай справы, па якой праходзіў Віктар Бабарыка, выява «Евы» стала адным з сімвалаў мірнага пратэсту.
«Еву» пачалі размяшчаць на майках, торбах, на аватарках у сацсетках. Яе друкавалі на стыкерах і паштоўках. Мірную акцыю культурнага пратэсту ў сеціве назвалі «евалюцыяй».
«Вакол „Евы“ стварыўся рух, розныя мастакі ў розных сферах прапаноўвалі свой адказ на сітуацыю з „Евай“… Потым гэта выплюхнулася на вуліцы», — казала ў інтэрв'ю Deutsche Welle філосаф Вольга Шпарага.
Вярнулі калекцыю ў галерэю «Арт-Беларусь» толькі ў чэрвені 2021 года.
