Беларуска расказала ў TikTok, як яны з мужам ажыццявілі мару — купілі сваё жыллё. Гэта быў недагледжаны вясковы дом з кучай хламу, які пара пачала рамантаваць. У будынку яшчэ шмат працы, але сям’я ўжо пераехала туды жыць. Пры гэтым аўтарка роліка паведаміла, што не кінула сваю працу ў Мінску: яна майстар манікюра і тры разы на тыдзень дабіраецца на электрычцы і метро да свайго кабінета.
Сям’я пяць гадоў арандавала жыллё ў Мінску. Усё жыццё туляцца па найманых кватэрах яны не хацелі, таму вырашылі купіць нерухомасць у вёсцы. Спярша муж і жонка шукалі дом за адну базавую велічыню (на сёння гэта 40 рублёў), але ім так нічога і не спадабалася. Прыдатны для куплі аб’ект знайшоўся ў аграгарадку Горкі Стаўбцоўскага раёна, ён размешчаны за 10 км ад Стоўбцаў і за 60 км ад Мінска. Гэтае жыллё прадавала прыватная асоба. У гэтым студзені беларусы сталі ўладальнікамі зарослага ўчастка плошчай 25 сотак і захламленага дома са старой мэбляй.
@diana.t.91 Сейчас в доме пусто 😅Даже не верится, что вот так как на видео когда-то было. Участок так же привели в порядок. Осталась работа внутри дома. Пол (самый тяжплый этап бужет для нас). Гадебсь мы справимся. #домвдеревне #реконструкциядома #деревня #беларусь #рек #ремонтсвоимируками ♬ Killing Me Inside — SELF CNTRL
Працы на набытым аб’екце трэба было шмат, але пара вырашыла, што разам яны справяцца. Надавала сіл і радавала, што цяпер у іх ёсць уласнае жыллё, тым больш лакацыя ім вельмі падабалася: недалёка ад дома — вялікае возера, з вёскай ёсць транспартныя зносіны, ездзіць аўтобус. А бонусам былі свежае паветра, прырода і адсутнасць гарадскога шуму і мітусні.
@diana.t.91 Никогда ничего не бойтесь. Если даже вам кажется что вы это не осилите, вот просто соберетесь, возьмите себя в руки и начните хоть что-нибудь да делать. И сами увидите результат. Я дело говорю, проверили😹#купилидомвдеревне #уборкадома #уборкаучастка #деревенскаяжизнь #реконструкциядома #дом #огород #сад #деревня #деревенскийвайб #деревенскиежители #беларусь #рек ♬ suara asli — 14july — 𝟖𝟖𝟖.𝟏𝟒𝐣𝐮𝐥𝐲
У лістападзе, калі дом быў адрамантаваны толькі часткова, сям’я разарвала дамову арэнды кватэры ў Мінску і пераехала жыць у вёску.
Аўтарка роліка расказала, што, нягледзячы на змену месца жыхарства, працаваць яна вырашыла на ранейшым месцы — майстрам у сваім манікюрным кабінеце ў Заводскім раёне Мінска. Жанчына патлумачыла, што яе бізнес — гэта «больш чым проста пазногці», гэта напрацаваная кліенцкая база, знаёмыя людзі ў будынку, дзе яна арандуе памяшканне, камфортная камунікацыя.
«Навошта мне з’язджаць з добрага месца і аддаваць кабінет канкурэнтам?» — адзначае блогерка. Хоць жанчына не выключае, што калі-небудзь яна адкрые справу ў Стоўбцах.
Цяпер беларуска тры дні на тыдзень ездзіць на працу. На дарогу ў адзін бок у яе ідзе крыху менш за дзве гадзіны. Звычайна муж падкідвае яе на аўтамабілі да чыгуначнай станцыі ў Стоўбцах (туды можна дабрацца і на аўтобусе), адтуль жанчына едзе электрычкай да Мінска, а потым спускаецца ў метро і едзе да сваіх кліентак.
«Ад паху электрычкі кайфую. Я не стамляюся наогул, бо мая праца прыносіць мне толькі задавальненне. Мне зручна, графік такі, што ўсё паспяваю, маючы дваіх дзяцей», — паведаміла аўтарка ролікаў.
У каментарах многія гледачы падбадзёрваюць яе, маўляў, з часам усё ў доме зробіце і будзеце радавацца. А што да выдаткаванага часу на дарогу, дык некаторыя лічаць, што ў гэтым няма нічога страшнага, бо часам, нават жывучы ў Мінску, даводзіцца гадзіну-паўтары дабірацца да патрэбнага месца. Аднак знайшліся і скептыкі, якія лічаць, што на аднаўленне «разваленага дома» пойдзе велізарная сума, да таго ж ідэя жыць у вёсцы не вельмі добрая, а ўжо ездзіць на цягніку ў Мінск, каб папрацаваць, — пагатоў.
«Я заўсёды казала: горад — гэта праца, вёска — жыццё. Я ў вёсцы адпачываю маральна, фізічна і наогул кайфую. У горадзе такога за восем гадоў жыцця ў мяне не было. Так што жыццё я выбіраю толькі ў вёсцы», — адказвае хейтарам блогерка.
Чытайце таксама
