Навукоўцы знайшлі ў печані і цягліцах вастраносых акул, злоўленых у прыбярэжных водах бразільскага Рыа-дэ-Жанейра, сляды какаіну, прычым канцэнтрацыя наркотыку занепакоіла іх. Вынік даследаванняў апублікаваны ў часопісе Science of the Total Environment.
Навукоўцы з Інстытута Освальда Круса ў Бразіліі даследавалі 13 бразільскіх вастраносых акул і высветлілі, што ўтрыманне какаіну ў арганізме гэтых рыб было ў 100 разоў вышэйшае, чым рэгістравалася раней у іншых марскіх жыхароў.
Гэтае адкрыццё сур’ёзна занепакоіла даследчыкаў, бо такі высокі ўзровень забруджання какаінам можа зрабіць таксічнае ўздзеянне на акул і нават негатыўна паўплываць на здароўе людзей, якія ядуць гэтых рыбін.
Эксперты мяркуюць, што какаін трапляе ў прыбярэжныя воды праз сцёкавыя воды з нелегальных лабараторый, непасрэдныя скіды ад наркаманаў і выкінутыя пакеты з наркотыкам ад наркагандляроў.
Вастраносыя акулы селяцца ў асноўным акурат у прыбярэжных водах, таму вымушаныя «спажываць» наркотык праз забруджаную ваду ці заражаную рыбу, магчыма, яны нават проста глытаюць пакеты з какаінам, што плаваюць у вадзе.
Даследчыкі дадалі, што адной з праблем усё большага какаінавага забруджання ёсць тое, што таксічныя рэчывы, трапляючы ў арганізм акул, могуць перашкаджаць выпрацоўцы вітэлагеніну, неабходнага для фармавання яйкаклетак.
Усе даследаваныя самкі былі цяжарныя, хоць навукоўцы пакуль не высветлілі магчымых наступстваў уздзеяння какаіну на плод. Таксама да гэтага часу не ясна, ці ўплывае прэпарат на паводзіны акул.