Як стала вядома «Люстэрку», у судзе Ленінскага раёна Мінска разглядаюць крымінальную справу пра нявыплату падаткаў і наўмыснае банкруцтва ў дачыненні, імаверна, буйнога бізнесоўца Андрэя Шыхліна.
Андрэя Уладзіміравіча Шыхліна будуць судзіць разам з Наталляй Паслядовіч. Абаіх абвінавачваюць па двух артыкулах Крымінальнага кодэкса. Гэта ч. 2 арт. 243 (Ухіленне ад выплаты падаткаў у асабліва буйным памеры) і ч. 2 арт. 240 (Наўмыснае банкруцтва).
Па першым артыкуле максімальны тэрмін пакарання — да сямі гадоў пазбаўлення волі, па другім — да пяці.
Першае паседжанне прайшло 30 ліпеня, наступнае будзе 6 жніўня. Разглядае справу суддзя Юлія Шчоткіна.
Падсудны — поўны цёзка буйнога бізнесоўца, фірма якога валодала гандлёвым цэнтрам «Арэна Сіці». Андрэй Шыхлін таксама займаўся франчайзінгавымі буцікамі MaxMara, Armani Collezioni і TWINSET.
На тое, што абвінавачаны — вядомы прадпрымальнік, паказвае тое, што 11 чэрвеня гэтага года прызналі банкрутам ягоную кампанію «Парагіс», якая знаходзіцца ў стадыі ліквідацыі з 2022 года. У красавіку 2024-га ў судзе пачалі разглядаць справу пра прызнанне яе банкрутам. Звярнулася з пазовам фірма «Дыспазітыў», якой «Парагіс» завінавацілася 106 тыс. рублёў, вынікае з судовага дакумента, апублікаванага ў рэестры банкруцтваў. Агульная сума нявыплачаных даўгоў фірмы складае амаль 35,89 млн рублёў. У той жа час сцвярджаецца, што ў даўжніка няма ніякай маёмасці ці грошай на рахунках, за кошт якіх можна было б выплачваць гэтыя даўгі.
Што вядома пра Шыхліна і яго фірмы?
Менавіта «Парагіс» у 2019 годзе перайшло кіраванне гандлёва-забаўляльным комплексам «Арэна-Сіці», якім раней кіравалі структуры апальнага бізнесоўца Юрыя Чыжа. А ўжо вясной 2022-га яго перадалі арганізацыі «А-Сіці», заснаванай за год да таго. Яна, у сваю чаргу, належыць «дачцэ» «Белаграпрамбанка» — «Агралізінгу». Менавіта гэты банк з 2016 года і валодае «Арэна-Сіці».
Зрэшты, як вынікае са звестак Адзінага дзяржрэгістра, Андрэй Шыхлін выйшаў са складу ўладальнікаў «Парагіс» яшчэ ў лістападзе 2020 года. Пасля гэтага спіс уладальнікаў не раз мяняўся. Цяпер аднаасобны ўласнік — агенцтва антыкрызіснага вядзення бізнесу «Гарант» грамадзяніна Ізраіля Алега Соніна.
Характэрна, што цягам года пасля лістапада 2020-га кампанія «Парагіс» належала Руслану Пятрову. За гэтым імем, як высветліла ў свой час выданне naviny.by, можа хавацца ўнук былога прэзідэнта Кыргызстана Курманбека Бакіева — Руслан Бакіеў. У 2019 годзе яны з Андрэем Шыхліным былі партнёрамі па бізнесе ў сферы будаўніцтва.
Сумесна з іншым бізнесоўцам, Уладзімірам Гурскім, Шыхлін валодае кампаніяй «Кирофф», якая кіруе бізнес-цэнтрам Kiroff Center у Мінску. У чэрвені ў Эканамічным судзе Мінска разглядалі ўстаноўчыя спрэчкі Шыхліна адносна гэтай кампаніі. Ёсць фінансавыя цяжкасці і ў гэтай фірмы: на аўкцыён за нявыплату па іпатэцы выстаўленыя яе гандлёвыя плошчы. Агульны стартавы кошт актываў — больш за восем мільёнаў рублёў.
Шыхлін дагэтуль пазначаны як намеснік старшыні Беларускай федэрацыі панкратыёна і змяшаных адзінаборстваў на сайце арганізацыі.
Поўная цёзка другой фігуранткі крымінальнай справы Наталлі Паслядовіч ёсць у спісе прадпрымальнікаў, якія аказваюць паслугі падатковых кансультантаў. У адкрытых крыніцах мы не знайшлі інфармацыі пра яе сувязі з фірмамі Шыхліна.